Акафист и молитва ксении петербургской

Православные молитвы ☦

Акафист Ксении Петербургской

(о замужестве, семейном благополучии и о сохранении беременности)

Избранная угодница Христова, святая блаженная Ксение, хвалебное пение ти приносим, чтуще терпение твое и злострадание вольное; ты же, имеющи дерзновение ко Господу, во всяких бедах и напастех заступай нас, грешных, взывающих к тебе:

Радуйся, Ксение блаженная, молитвеннице о душах наших.

Равноангельски на земли пожила еси, блаженная мати, по успении мужа твоего, без приуготовления христианскаго внезапу скончавшагося, отвергла еси жизнь мирскую, Бога молящи супруга твоего душу помиловати, подвиг юродства на себе приявши, стяжала еси совершенство духовное. Того ради услыши от нас похвалы сия, тебе возносимыя:

Радуйся, Христова угоднице, в мире надмирно пожившая;

Радуйся, вси прилоги мира, плоти и диавола победившая.

Радуйся, нищету вольную на всю жизнь избравшая;

Радуйся, сокровище безценное на Небеси улучившая.

Радуйся, печали и скорби безропотно сносившая;

Радуйся, народом православным любимая и славимая.

Радуйся, о часе смертнем помнити нас призывающая;

Радуйся ближняго душу паче мира сего любити научающая.

Радуйся, Ксение блаженная, молитвеннице о душах наших.

Видяще странное твое житие, блаженная, яко ты во цвете младости твоея во одежду мужа твоего усопшаго облеклася, именем его нареклася и себе умершею глаголала еси, дом же твой и вся блага земная оставивши, скиталицею себе сотворила еси, сродницы безумною тя мняху, люди же боголюбивии воспеша: Аллилуиа.

Разум, от Бога дарованный, сокрыла еси, блаженная Ксение, во безумии мнимом; в суете града великаго аки пустынница жила еси, молитвы к Богу возносящи непрестанно. Мы же, дивящеся житию твоему, воспеваем сице:

Радуйся, от Бога крест тяжкий юродства на раме свои приявшая;

Радуйся, мнимым безумием сияние благодати сокрывшая.

Радуйся, именем мужеским нарекшися, немощи женския отрешившаяся;

Радуйся, житием твоим Андрею, Христа ради юродивому, равная.

Радуйся, все имение твое бедным людям раздавшая;

Радуйся, жилище Духу Святому в сердце твоем уготовившая.

Радуйся, всех прибегающих к тебе благое утешение;

Радуйся, от смерти внезапныя избавление.

Радуйся, Ксение блаженная, молитвеннице о душах наших.

Силою, свыше ти дарованною, благодатию и мужеством зной и стужу лютую одолевала еси молитвою всенощно творимою, и поклонами; темже и прославлена бысть святость твоя, блаженная Ксение, во Отечестве нашем многострадальнем и во всем мире православнем, да зовем с тобою Богу: Аллилуйя.

Имела еси, о Мати блаженная, небо — покров, землю же — ложе свое, попечением о теле, во одежду ветхую облеченном, небрегла еси, молитвы же к Богу пламенне возносила еси, Сего ради воспеваем ти сице:

Радуйся, век твой земный без крова проведшая;

Радуйся, Небеснаго крова взыскавшая и того улучившая.

Радуйся, по вся времены года всенощно в поле молившаяся;

Радуйся, поклоны земныя на вся страны света тамо творившая.

Радуйся, град Петров всенощным бдением от бед ограждавшая;

Радуйся, гнев Божий от него многажды отвращавшая.

Радуйся, благодатию Духа Святаго чудесно согреваемая;

Радуйся, хлад лютый душ наших молитвою твоею растопляющая.

Радуйся, Ксение блаженная, молитвеннице о душах наших.

Бурю житейскую, на стогнах града твоего мятущуюся, кротостию и незлобием одолевала еси, мати блаженная; безстрастие же посреди мира дольняго стяжала еси. Духом Святым просвещаемая, взывала еси Подателю тишины сердечныя Богу: Аллилуйя.

Слышаша людие дар прозрения чудный, тобою явленный, святая мати, и дивишася. Се, жене некоей рекла еси: «Возьми пятак, тут царь на коне… Потухнет». Та же, не ведаюши, яко ты пожар дома ея прозрела еси, притече во своя си и узре дом свой, во огни горящ. И по молитве твоей пламень огня угасе. Людие же страждущии к помощи твоей прибегаху, юже стяжавше, взываша ти сице:

Радуйся, дар прозрения смирением крайним стяжавшая;

Радуйся, дар сей на пользу и спасение страждущих являвшая.

Радуйся, свеще негасимая, к Богу в молитвах горевшая;

Радуйся, верою твоею пламенною пожары домов угашавшая.

Радуйся, грядущая страдания людская аки настоящая зревшая;

Радуйся, врачем безмедным и милосердым людем бывшая.

Радуйся, яко и нас, немощных в вере, укрепляеши;

Радуйся, яко сиянием святости твоея народ православный озаряеши.

Радуйся, Ксение блаженная, молитвеннице о душах наших.

Боготечною звездою осветила еси небосклон града Петра апостола святость твоя, угоднице Божия, уже бо людям, во безумии греха погибающим, явила еси путь спасения, к покаянию их призывающи, во еже вопити Богу: Аллилуйя.

Видяще подвиги твоя молитвенныя, терпение хлада и зноя великое, людие ослабити желаху страдания твоя, ты же одежду и вся ими приносимая нищим раздавала еси, нищету свою аки сокровище хранящи. Сего ради слышиши от нас сицевая:

Радуйся, богатство твое токмо в любви к Богу и ближним полагавшая;

Радуйся, ничтоже земное имевшая и всех духовно богатившая.

Радуйся, милостивым твоим сердцем страждущим сострадавшая;

Радуйся, помощь им чрез людей добрых посылавшая.

Радуйся, миру чуждая, в мире живущим добро творившая;

Радуйся, века сего суемудрия отвергатися научившая.

Радуйся, плакати со плачущими нас подвигающая;

Радуйся, от сна тяжкаго греховнаго пробуждающая.

Радуйся, Ксение блаженная, молитвеннице о душах наших.

Проповедана бе святость жития твоего, богоблаженная, жителем града твоего, егда ты о младенце, еще не рождшемся, заботу явила еси, и жене доброй, в доме, тобою дарованном, жившей, прорекла еси: «Бог тебе сына послал, теки на кладбише Смоленское!» Она же поспешила есть, и сиротку, рожденнаго у матере, внезапу на пути пострадавшей и скончавшейся, в дом свой прияла есть. И вси, аки семья единая, вся лета жития своего, тебе благодаряще, Богу Человеколюбцу взываша: Аллилуйя.

Возсияла есть слава подвигов твоих, блаженная мати Ксение, егда ты нощию на верх храма Смоленскаго камни, таящися, носила еси, дому Пречистыя возградитися пособствующи. Ныне же вси молящиися во святем храме сем и всем мире Божием, на образ твой взирающе, воспевают сице:

Радуйся, к подвигом благочестия всех призывающая;

Радуйся, тайно творити добро научающая.

Радуйся, храмы Божия зиждущим помогающая;

Радуйся, святыню церковную возлюбившая.

Радуйся, в делех благих усердное поспешение;

Радуйся, трудов наших на пути спасения облегчение.

Радуйся, под кровом Божия Матере подвиги творившая и тако почившая;

Радуйся, с Нею ныне на Небеси о нас Христа молящая.

Радуйся, Ксение блаженная, молитвеннице о душах наших.

Хотя судьбы людския во благая устроити, повелела еси деве кроткой на Охту тещи, прорекши: «Муж твой тамо жену хоронит!» Она же в недоумении бысть, обаче не ослушася глагола твоего, и тамо вдовца младаго, над гробом жены рыдавшаго, сретила есть и утешение в молитве ему подаде. Году же минувшу, они венчахуся. В любве и согласии многая лета поживше, чад своих наставляша тебе, святая мати, чтити, Богу же воспеваху песнь: Аллилуйя.

Новое чудо показала еси, блаженная посреде скверны людския юродством сокрытую душу твою в кротости ангельстей соблюдши. Научи и нас, мати Ксение, и малыя доли скорбей твоих не терпящих и в ропоте на Бога и ближняго дни наша иждевающих, вся свыше посылаемая в терпении сносити, да, взирающе на подвиги твоя, чистым сердцем зовем ти сице:

Радуйся, миру злохладному благодатную мудрость явившая;

Радуйся, нищеты духовныя блаженство вкусившая.

Радуйся, образ терпения и благосердия нам подающая;

Радуйся, смирением и покаянием от бед избавитися научающая.

Радуйся, с молитвою и любовию детей благословлявшая;

Радуйся, ласкою рук твоих чудесно их исцелявшая.

Радуйся, тоску тяжкую, душу сокрушающую, от нас отводящая;

Радуйся, надеждою несумненною на милость Божию окрыляющая.

Радуйся, Ксение блаженная, молитвеннице о душах наших.

Странницею бездомною протекла еси путь скорбный жизни твоея в стольнем граде Отечества нашего, мати всеблаженная, взыскующи Града Вышняго, Иерусалима Небеснаго; ныне же в нем со ангелы и всеми святыми поеши Богу: Аллилуйя.

Вся в молитвах ко Творцу пребываюши, мати святая, до успения твоего, от страданий и подвигов к жизни блаженней и вечней невозбранно прешла еси. Сего ради, преклоняюще колена сердец наших, благоговейное пение ти приносим:

Радуйся, во обителех горних с лики святых ликующая;

Радуйся, и нас, тебе молящихся, тамо не забывающая.

Радуйся, чудеса неизчетныя по успении твоем явившая;

Радуйся, смертно болящих, врачами оставленных, исцелявшая.

Радуйся, во пиянстве гибнущих устрашение и исправление;

Радуйся, места служения лишившимся благое поспешение.

Радуйся, вдовиц и жен, супругом оставленных, покровительнице;

Радуйся, странников и безприютных питательнице.

Радуйся, Ксение блаженная, молитвеннице о душах наших.

Всякия утоли болезни, блаженная мати Ксение, на тя надеющихся и к помощи твоей усердно притекающих, поминающих душу твою для души своея спасения, како ты завещала еси, Богу же, в тебе прославленному, вопиющих непрестанно: Аллилуйя.

Ветия суемудренныя разумети не могут, како ты безумием своим безумие мира сего обличила еси и немощию своею сильныя и крепкия посрамила еси, не ведают бо в тебе силы Божия и премудрости. Мы же, тя почитающе, с любовию зовем ти сице:

Радуйся, Божественнаго Духа селение;

Радуйся, велие к Богу дерзновение.

Радуйся, на усыпальнице твоей молящимся являющаяся и им помогающая;

Радуйся, землею и елеем от нея многия освятившая и от недуг исцелившая.

Радуйся, яко одержимых страстьми от гибели спасаеши;

Радуйся, яко отвергатися себе нас научаеши.

Радуйся, любви и смирения путь во спасение нам открывающая;

Радуйся, души наша к жизни будущаго века готовящая.

Радуйся, Ксение блаженная, молитвеннице о душах наших.

Спасти люди хотящи, блаженная мати Ксение, присно даруеши им заступление твое чудное. Се, деву благочестивую, со вдовицею материю ея в канун венчания у могилы твоея усердно молившуюся, от брака спасла еси со злодеем, иже ратнаго человека уби, имя же и чин его себе присвой. В день тойже убийца оный внезапу обличен бе и, ужасом объят, признася всенародно, яко сила Божия сироту от брака с ним избави. Мы же, дивящеся силе молитв твоих, спасающих, воспеваем Богу: Аллилуйя.

Стена еси нерушимая, преблаженная мати, домом православных. Не остави и ныне супруги разделенныя, помози родителем, за грехи своя о чадех слезы проливающим, научи юноши и девы в чистоте себе хранити и всех нас святыню уз семейных почитати, да единеми усты воспеваем ти сице:

Радуйся, дев благочестивых от брака невернаго избавляющая;

Радуйся, спутника жизни добраго им обрести помогающая.

Радуйся, сродников враждующих благое примирение;

Радуйся, слез детских осушение.

Радуйся, от убиения младенцев во чреве женам грозное прещение;

Радуйся, на камени любви и веры домов устроение.

Радуйся, супругов, смертию разлученных, ограждение;

Радуйся, в жизни безсмертней вечное их соединение.

Радуйся, Ксение блаженная, молитвеннице о душах наших.

Пение благодарственное приносят ти, мати блаженная, людие православнии, от бед и болезней молитвами твоими избавленнии. И ныне, аще попустит нам праведный Господь скорби грех наших ради, со слезами к тебе припадем, уповающе на милостивое твое о нас к Богу предстательство, да воспоем Ему. Аллилуйя.

Светозарным лучем, во мраце жизни сея путь ко Свету Неприступному освещающим, явися житие твое, богомудрая Ксение, и прославление всенародное, чудес множеством осиянное. И в годину лютую гонений безбожных вернии от часовни твоея не отступиша, но, презревше и страх смертный, с верою и упованием к тебе притекаху, сердцем воспевающе сице:

Радуйся, безнадежных надеяние;

Радуйся, в бездне отчаяния погибающих спасение.

Радуйся, униженных и гонимых покровительнице;

Радуйся, от клеветы и суда неправеднаго защитнице.

Радуйся, обидимых и обездоленных утешение;

Радуйся, обидящих грозное вразумление.

Радуйся, града святаго Петра Небесная .заступнице;

Радуйся, чадом земли Российския мати и кормилице.

Радуйся, Ксение блаженная, молитвеннице о душах наших.

Благодать утешений обильно изливаеши, блаженная Ксение, всем чтущим память твою и к заступлению твоему притекающим. Темже и мы, грешнии, по Бозе на тя надежду возлагаем и молимся тебе усердно: не остави нас во обстояниих скорбных, умоли Господа Сил, да не отпадем от веры нашея православныя, в нейже тобою утверждаеми, зовем Ему верно: Аллилуйя.

Поюще многая твоя чудеса, блаженная мати Ксение, восхваляем тя, яко теплую нашу заступницу и скорую предстательницу. Улучающе же от тебе помощь благодатную, неустанно воспеваем сице:

Радуйся, светом кротости твоея вся концы земли озарившая;

Радуйся, житием твоим постническим гордыню диавольскую посрамившая.

Радуйся, мира Божия в сердца верных принесение;

Радуйся, дому царскому поможение и благословение.

Радуйся, о спасении Отечества нашего присно молящая;

Радуйся, во Отечество Небесное нам путь указующая.

Радуйся, по Богородице в скорбех и печалех наше утешение;

Радуйся, по Бозе грехов наших прощение и вечное спасение.

Радуйся, Ксение блаженная, молитвеннице о душах наших.

О, святая блаженная мати Ксение, в житии твоем крест тяжкий понесшая, приими от нас грешных моление сие, тебе приносимое, огради нас молитвами твоими от наветов духов тьмы, от бед и напастей, умоли Всещедраго Бога подати нам силу и крепость, да, вземше крест свой, во след Христу грядем, поюще Ему с тобою во веки: Аллилуйя.

(Этот кондак читается трижды, затем икос 1 и кондак 1)

Равноангельски на земли пожила еси, блаженная мати, по успении мужа твоего, без приуготовления христианскаго внезапу скончавшагося, отвергла еси жизнь мирскую, Бога молящи супруга твоего душу помиловати, подвиг юродства на себе приявши, стяжала еси совершенство духовное. Того ради услыши от нас похвалы сия, тебе возносимыя:

Радуйся, Христова угоднице, в мире надмирно пожившая;

Радуйся, вси прилоги мира, плоти и диавола победившая.

Радуйся, нищету вольную на всю жизнь избравшая;

Радуйся, сокровище безценное на Небеси улучившая.

Радуйся, печали и скорби безропотно сносившая;

Радуйся, народом православным любимая и славимая.

Радуйся, о часе смертнем помнити нас призывающая;

Радуйся ближняго душу паче мира сего любити научающая.

Радуйся, Ксение блаженная, молитвеннице о душах наших.

Избранная угодница Христова, святая блаженная Ксение, хвалебное пение ти приносим, чтуще терпение твое и злострадание вольное; ты же, имеющи дерзновение ко Господу, во всяких бедах и напастех заступай нас, грешных, взывающих к тебе:

Радуйся, Ксение блаженная, молитвеннице о душах наших.

По окончании акафиста читается молитва:

«О святая всеблаженная мати Ксение! Под покровом Всевышняго жившая, ведомая и укрепляемая Богоматерью, голод и жажду, холод и зной, поношения и гонения претерпевшая, дар прозорливости и чудотворения от Бога получила еси и под сенью Всемогущего покоишися. Ныне святая Церковь, яко благоуханный цвет, прославляет тя. Предстояще на месте твоего погребения, пред образом твоим святым, яко живей ти, сущей с нами, молимся ти: приими прошения наша и принеси их ко престолу милосерднаго Отца Небеснаго, яко дерзновение к Нему имущая, испроси притекающим к тебе вечное спасение, на благая дела и начинания наша щедрое благословение, от всяких бед и скорбей избавление. Предстани святыми твоими молитвами пред Всемилостивым Спасителем нашим о нас, недостойных и грешных. Помози, святая блаженная мати Ксение, младенцы светом святого крещения озарити и печатию дара Духа Святаго запечатлети, отроки и отроковицы в вере, честности, богобоязненности воспитати и успехи в учении им даровати; болящия и недугующия исцели, семейным любовь и согласие ниспосли, монашествующих подвигом добрым подвизатися удостой и от поношений огради, пастыри в крепости Духа Святаго утверди, народ и страну нашу в мире и безмятежии сохрани, о лишенных в предсмертный час причащения Святых Христовых Тайн умоли. Ты наша надежда и упование, скорое услышание и избавление, тебе благодарение воссылаем и с тобою славим Отца и Сына и Святаго Духа, ныне и присно, и во веки веков. Аминь.»

Православные иконы и молитвы

Информационный сайт про иконы, молитвы, православные традиции.

Акафист Ксении Петербургской

«Спаси, Господи!». Спасибо, что посетили наш сайт, перед тем как начать изучать информацию, просим подписаться Вас на нашу группу Вконтакте Молитвы на каждый день. Так же посетите нашу страничку в Одноклассниках и подписывайтесь на ее Молитвы на каждый день Одноклассники. «Храни Вас Господь!».

Самым известным песнопением в православном мире до сегодняшнего дня является акафист Ксении Блаженной. Это святая, которая покорила сердца миллионов верующих своими чудесами, а тем, кто имел сомнения, дала надежду на спасение и привела в храм Божий. Она поистине чудотворна, ибо сила её не знает границ.

Акафист Ксении Петербургской

История жизни этой святой поражает своей жертвенностью и огромной духовной силою. Потеряв рано мужа, который внезапно умер без христианского покаяния, молодая вдова решилась на труднейший православный подвиг – принести себя в жертву Господу, пройдя свой путь в обличии мужа и возложить его на алтарь, дабы он обрёл вечное спасение и покаяние.

Блаженная прошла через непонимание родных, обвинения в безумстве, людские укоры и гонения, но не отреклась от своего. Её душа была настолько широка, а дух настолько силён, что со временем люди поверили в мощь молитвы и стали изрекать песни в честь святой во имя спасения своего и своих близких.

• Она помогала сохранить семейное благополучие, избавляла меленьких детей от всяких болезней, а её помощь в зачатии и рождении детей не знает границ возможного. Именно с этой мольбой к ней наиболее часто взывают женщины, которые мечтают о детях.
• Ведь Ксения, как никто другой, понимает, как тяжело им в этом мире, какой тяжёлый путь проходят они изо дня в день, ведь так шла и боролась она сама.
• Песнопения перед иконой святой избавляют от бед и страданий всякого к ней приходящего, дают надежду и вселяют веру в лучшее.

Но также каждый, кто уверовал её силу, должен понимать, что только пройдя огромный и сложный путь духовного становления, основным источником которого является самопожертвование и отречение, можно обрести долгожданную благодать Всевышнего.

Такой путь прошла святая Ксения, такою была дорога Господа – и всё это во спасение каждого живущего на земле, ибо вера вечна, и если она уже с человеком – он выдержит всё.

Акафист Ксении Петербургской, читать:

Избранная угодница и Христа ради юродивая, святая блаженная мати Ксение, избравшая подвиг терпения и злострадания, хвалебное пение приносим ти, чтущии святую память твою. Ты же заступи нас от враг видимых и невидимых, да зовем ти: Радуйся, Ксение блаженная, молитвеннице о душах наших.

Равноангельскаго жития взыскала еси, блаженная мати, по успении мужа твоего отвергла еси мира сего красоту и вся, яже в нем: похоть очес, похоть плоти и гордость житейскую, юродством разум Христов стяжала еси. Того ради услыши от нас похвалы, тебе возносимыя:

Радуйся, житием твоим Андрею, Христа ради юродивому, равная.

Радуйся, имене своего отрекшаяся, себе же умершею именовавшая.

Радуйся, в юродстве имя мужа твоего Андрея принявшая.

Радуйся, именем мужеским назвавшись, немощи женския отрешившаяся.

Радуйся, все имение твое добрым людем и нищим раздавшая.

Радуйся, нищету добровольную Христа ради приявшая.

Радуйся, века сего суемудрия юродством твоим отвергатися нас научившая.

Радуйся, благая утешительнице всех в молитве к тебе прибегающих.

Радуйся, Ксение блаженная, молитвеннице о душах наших.

Видя странное твое житие, яко ты презрела еси дом свой и всякое мирское богатство, родные по плоти безумною тя полагаху, людие же града Петрова, видя смирение твое, нестяжание и вольную нищету, воспели Богу: Аллилуиа.

Разум, от Бога тебе данный, ты, Ксение блаженная, в мнимом безумии скрыла еси; в суете града великого аки пустынница жила еси, молитвы к Богу своя вознося непрестанно. Мы же, дивящеся таковому житию твоему, взываем тебе хвалебно:

Радуйся, крест тяжкий юродства, от Бога тебе данный, на рама своя принявшая.

Радуйся, мнимым безумием сияние благодати скрывавшая.

Радуйся, дар прозорливости смирением крайним и подвигом молитвы стяжавшая.

Радуйся, дар сей на пользу и спасение страждущих являвшая.

Радуйся, страдания людския прозорливо в дали необозримей зревшая.

Радуйся, жене добрей о рождении сына прорекшая.

Радуйся, яко жене той у Бога чадо испросившая.

Радуйся, всех к Богу в молитве прибегати научившая.

Радуйся, Ксение блаженная, молитвеннице о душах наших.

Силою свыше, от Бога тебе дарованною, зной и люту стужу мужественно претерпевала еси, распиная плоть свою со страстьми и похотьми. Темже, Духом Святым просвещаемая, взывала непрестанно Богу: Аллилуиа.

Имея, о блаженная, небо покровом себе, землю же ложем своим, отвергла еси плотоугодие Царства Божия ради. Мы же, зряще таковое твое житие, со умилением зовем ти:

Радуйся, жилище свое земное людем отдавшая.

Радуйся, небеснаго крова взыскавшая и получившая.

Радуйся, ничтоже земное имущая, а всех духовно богатящая.

Радуйся, житием своим терпению нас научающая.

Радуйся, любовь Божию людем показующая.

Радуйся, плодами благочестия украшенная.

Радуйся, терпение и незлобие миру явившая.

Радуйся, теплая предстательнице наша пред Престолом Всевышняго.

Радуйся, Ксение блаженная, молитвеннице о душах наших.

Бурю житейскую, во граде Петрове мятущуюся, кротостию и незлобием преодолела еси, блаженная мати, безстрастие же к тленному миру стяжала еси. Темже и поеши Богу: Аллилуиа.

Слыша о тебе, яко ты, злостражда Христа ради, скорбных утешаеши, немощных укрепляеши, заблуждших на путь правый наставляеши, людие страждущии к помощи твоей прибегаху, воспевающи тебе:

Радуйся, путь Христов всем сердцем возлюбившая.

Радуйся, крест Христов радостно понесшая.

Радуйся, всякое поношение от мира, плоти и диавола претерпевшая.

Радуйся, даров Божиих преисполненная.

Радуйся, любовь к ближним явившая.

Радуйся, страждущим людем утешение подававшая.

Радуйся, слезу плачущих отиравшая.

Радуйся, благодатию Духа Святаго чудесно согреваемая.

Радуйся, Ксение блаженная, молитвеннице о душах наших.

Боготечною звездою явися святость твоя, Ксение блаженная, осветившая небосклон града Петрова. Уже бо людем, гибнущим в безумии греха, ты явила путь спасения, всех к покаянию призывая, во еже вопити к Богу: Аллилуиа.

Видя подвиги твоя в молитве, терпении хлада и зноя, благочестивые людие пытахуся умалити страдания твоя, одежду тебе и пищу приносяще. Ты же вся сия нищим раздавала еси, желая в тайне подвиг свой сохранити. Мы же, дивяся вольней нищете твоей, взываем ти сице:

Радуйся, зной и стужу Христа ради добровольно терпевшая.

Радуйся, в молитве непрестанно пребывавшая.

Радуйся, град Петров всенощным бдением от бед ограждавшая.

Радуйся, гнев Божий многажды от него отвращавшая.

Радуйся, во вся дни года ночами в поле молившаяся.

Радуйся, сладость райскую в нищете духовней вкусившая.

Радуйся, яко в сладости сей вся земная оставившая.

Радуйся, яко вся в Бозе пребывавшая.

Радуйся, Ксение блаженная, молитвеннице о душах наших.

Проповедуют святость жития твоего, богоблаженная, вси избавленнии тобой от многоразличных болезней, бед и скорбей, богатии и убозии, старцы и юныя. Темже и мы, прославляюще тя, Богу вопием: Аллилуиа.

Возсияла слава подвигов твоих, блаженная мати, егда ты нощию строителем церкве Смоленския камни тайно носила еси, облегчая труды делателей церковных. Сия ведуще и мы, грешнии, зовем ти таковая:

Радуйся, тайно творити добродетели нас научающая.

Радуйся, к подвигом благочестия всех призывающая.

Радуйся, строителем храмов Божиих помогающая.

Радуйся, святость церковную возлюбившая.

Радуйся, труды наша на пути спасения облегчающая.

Радуйся, к тебе прибегающих скорая помощнице.

Радуйся, всем скорбящим благая утешительнице.

Радуйся, града Петрова Небесная заступнице.

Радуйся, Ксение блаженная, молитвеннице о душах наших.

Хотя избавити от скорби плачущаго врача, жену хоронившаго, ты повелела некоей девице на Охту бежати и тамо мужа себе обрести и утешити. И совершишася тако, яко же ты рекла еси. Они же в радости воспеша Богу: Аллилуиа.

Новое чудо в молитве своей показала еси ты, блаженная мати, егда рекла еси жене благочестивей: «Возьми пятак, потухнет». Сим прорекла еси ей о пожаре дома ея. И по молитве твоей пламень огня угасе. Мы же, ведяще сия, вопием ти похвальная:

Радуйся, скорби людския угашающая.

Радуйся, дерзновение пред Богом за страждущих явившая.

Радуйся, свеща неугасимая, в молитвах к Богу ярко горящая.

Радуйся, предстательнице наша в бедах и напастех.

Радуйся, страстьми одержимых от гибели спасающая.

Радуйся, благочестивых дев от брака невернаго отвращающая.

Радуйся, клеветою уязвленных от отчаяния избавляющая.

Радуйся, на суде неправедном скорая защитнице.

Радуйся, Ксения блаженная, молитвеннице о душах наших.

Странницею бездомною прошла еси путь жизни твоея в стольном граде, в велицем терпении скорби и поношения неся; ныне же, в Горнем Иерусалиме пребывая, в радости поеши Богу: Аллилуиа.

Всем вся была еси, Ксение блаженная: скорбящим утешение, немощным покров и защищение, печальным радование, нищим одеяние, болящим исцеление. Сего ради и вопием тебе:

Радуйся, в горних обителех пребывающая.

Радуйся, о нас, грешных, тамо молящаяся.

Радуйся, благий образ служения Богу явившая.

Радуйся, униженных и гонимых покровительнице.

Радуйся, православный люд молитвами твоими заступающая.

Радуйся, обидимых и молящихся тебе защищающая.

Радуйся, обидящих вразумляющая.

Радуйся, неверных и глумителей посрамляющая.

Радуйся, Ксение блаженная, молитвеннице о душах наших.

Всякия претерпела еси болезни, блаженная мати, нищету телесную, глад и жажду, еще же и поношение от людей беззаконных, иже мняху тя безумною быти. Ты же, Господу моляся, выну взывала еси Ему: Аллилуиа.

Ветия многовещанныя не могут разумети, како ты безумием своим безумие мира сего обличила еси и немощию своею посрамила еси крепкия и мудрыя: не ведают бо в тебе Божией силы и Божией премудрости. Мы же, помощь твою получившии, поем ти таковая:

Радуйся, Божественнаго Духа носительнице.

Радуйся, со Апостолом Павлом немощию своею хвалившаяся.

Радуйся, мнимым безумием своим мир обличившая.

Радуйся, красоту века сего спасения ради отвергшая.

Радуйся, небесная блага всем сердцем возлюбившая.

Радуйся, на путь спасения нас призывающая.

Радуйся, во гресе пиянства грозная обличительнице.

Радуйся, безмездным и милостивым врачем всем бывшая.

Радуйся, Ксение блаженная, молитвеннице о душах наших.

Хотя спасти душу, ты плоть свою со страстьми и похотьми распяла еси и, невозвратно себе отвергши, крест свой на рама своя возложила еси и Христу всем сердцем последовала еси, поя Ему: Аллилуиа.

Стена еси твердая и прибежище необоримое явилася молящимся тебе, мати Ксения. Темже заступай и нас от враг видимых и невидимых молитвами твоими, да зовем ти:

Радуйся, на труд духовный нас воздвигающая.

Радуйся, от сетей вражиих нас избавляющая.

Радуйся, фимиам кадильный, Богу приносимый.

Радуйся, мир Божий в сердца людей приносящая.

Радуйся, дух злобы в сердцах озлобленных угашающая.

Радуйся, детям благим благословение подающая.

Радуйся, тайною молитвою их от болезней исцеляющая.

Радуйся, миру озлобленному мудрость Божию явившая.

Радуйся, Ксение блаженная, молитвеннице о душах наших.

Пение хвалебное приносят ти, Ксение блаженная, спасшиися твоими молитвами от бед, и скорбей, и всяких напастей, и купно с тобою радостно поют Богу: Аллилуиа.

Светозарным светом явилось житие твое, святая мати, во мрацке жития сего освещающим люди: ты бо падшия из тины греха избавила еси, и к свету Христову направила путь их. Темже и зовем ти:

Радуйся, православныя люди Божиим светом просвещающая.

Радуйся, Христова угоднице, в мире надмирно пожившая.

Радуйся, труды многими велию благодать стяжавшая.

Радуйся, во тьме греха благодатию Божиею сиявшая.

Радуйся, отчаявшимся на пути спасения руку помощи подающая.

Радуйся, немощных в вере укрепляющая.

Радуйся, духов злобы посрамляющая.

Радуйся, житием своим Ангелы удивившая.

Радуйся, Ксение блаженная, молитвеннице о душах наших.

Благодать обильно источаеши, Ксение блаженная, на чтущих память твою и прибегающих к покрову твоему. Темже и нам, тебе молящимся, источи от Бога струи исцеления, да зовем Ему: Аллилуиа.

Поюще многая чудеса твоя, блаженная мати, восхваляем тя и всеусердно молим: не остави нас, грешных, в скорбных обстояниих, но умоли Господа сил, да не отпадем от веры нашея Православныя, в нейже тобою утверждаеми, зовем ти:

Радуйся, сострадати страждущим нас научающая.

Радуйся, немощи наша всеусердно врачующая.

Радуйся, распинати плоть со страстьми и похотьми научающая.

Радуйся, о чтущих память твою ходатаице и покровительнице.

Радуйся, скорбный путь прошедшая.

Радуйся, спасение вечное сим улучившая.

Радуйся, ко гробу твоему притекающим отраду подающая.

Радуйся, о спасении Отечества нашего присно ходатайствующая.

Радуйся, Ксение блаженная, молитвеннице о душах наших.

О святая блаженная мати Ксение, в житии твоем крест тяжкий понесшая. Приими от нас, грешных, моление сие, к тебе приносимое. Огради нас молитвами твоими от наветов духов тьмы и всех мыслящих нам злая. Умоли всещедраго Бога подати нам силу и крепость, да кийждо от нас возмет крест свой и во след Христу грядет, поя Ему с тобою: Аллилуиа.

Этот кондак читается трижды, затем икос 1 и кондак 1.

Господь всегда с Вами!

Смотрите еще и видео акафист Святой Блаженной Ксении: