Молитва св иринарху ростовскому

Икона преподобному Иринарху, затворнику Ростовскому.

Молитвы преподобному Иринарху, затворнику Ростовскому.

О великий угодниче Христов, добропроизвольный страдальче, новопросиявый чудесы, отче наш Иринарше. Российстей земли удобрение, граду Ростову похвало, обители сей велие украшение и утверждение! Кто не удивится твоему самопроизвольному и долголетнему страдальческому терпению: Тридесять бо лет в тесней и хладней хижине себе заключил еси, хлад, алчбу и изнурение плоти Царствия ради Небеснаго понесл еси, к сему же и изгнание из обители, по наваждению вражию, безропотно претерпел еси. Вемы же, яко посреди умолен быв от братии, яко незлобивый агнец, паки в обитель твою возвратился еси и в туюжде хижину вселился еси, яко адамант твердый, на невидимая бесовская полчища и видимыя враги твоя терпением себе вооружив. Егда же попущением Божиим наидоша на обитель сию польстии ратницы, сих не убоялся еси смертнаго прещения, но уцеломудрився словом, во своя си возвратитися сотворил еси. Сего ради Всеблагий Бог, видя твою веру и страдальческое долготерпение, дар прозорливства и исцеления тебе дарова: бесным бо исцеление, хромым доброхождение, слепым прозрение подавал еси, и иная многая с верою к тебе приходящим во благо даже доднесь чудодействуеши. Мы же недостойнии, таковая чудеса видяще и радости исполняющеся, взываем к тебе сице: радуйся, доблественный страдальче и бесов победителю, радуйся скорый наш помощниче и теплый к Богу молитвенниче. Услыши убо и нас грешных, молящихся тебе и прибегающих под кров твой: яви милостивное предстательство твое о нас ко Всевышнему и исходатайствуй твоими богоприятными молитвами вся полезная ко спасению душ и телес наших, сохрани святую обитель сию, всякий град и весь и всякую страну христианскую от всех наветов вражиих, в скорбех же и болезнех наших подавай нам руку помощи, да твоим ходатайством и заступлением, благодатию же и милосердием Христа Бога нашего, избавимся и мы недостойнии, по отшествии от жития сего, шуияго стояния, и да сподобимся деснаго со всеми святыми во веки веков. Аминь.

О преподобне отче Иринарше! Се мы молим тя усердно: буди ходатай наш присный, испроси нам, рабам Божиим (имена), от Христа Бога мир, тишину, благоденствие, здравие и спасение, и от всех врагов видимых и невидимых ограждение, покрый же нас ходатайством твоим от нахождения всяких бед и скорбей, паче же от искушений врага темнаго, да вси мы с тобою прославляем всесвятое имя Отца и Сына и Святаго Духа, ныне и присно и во веки веков. Аминь.

О предивный и преславный чудотворче, преподобне и достоблаженне отче Иринарше! Величающе труды твоя и болезни и прославляюще великое твое дерзновение ко Господу, тебе, яко отца чадолюбива, молим: ходатайствы твоими испроси нам у Господа, яже на пользу душам и телесем нашим: веру праву, надежду несомненну, любовь нелицемерну, во искушеиих мужество, в злостраданиих терпение, в благочестии преспеяния, и благословение свыше на вся благая дела и начинания наша. Испроси угодниче Христов у Всемогущаго Бога: страждущую страну Российскую от лютых безбожник и власти их да свободит, и да воставит престол православных царей: верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. Не забуди, чудотворче святый, милостивно присещати обитель твою, вся грады и веси страны нашея, сохраняя и соблюдая молитвами твоими от всякаго зла. Помяни всех, веру к тебе имущих и имя твое на помощь призывающих, и вся во благих прошения их милостивно исполни. Ей, святче Божий, не лиши и нас грешных твоего заступления, сподобляя нас кончину жития благую улучити и Царствия Небеснаго наследники быти, да воспоем и прославим дивнаго во святых своих Бога, Отца, и Сына и Святаго Духа, в безконечеыя веки веков. Аминь.

Тропарь преподобному Иринарху, затворнику Ростовскому.

Яко мученика добропроизвольна и преподобных удобрение, звезду Ростовскую, в затворе, узах и веригах Господеви благоугодившаго и чудес благодать от Него приемшаго, Иринарха предивнаго песньми хвалебными почтим и, к нему припадающе, умильно глаголем: отче преподобне, моли Христа Бога спастися душам нашим.

Житие преподобного отца нашего Иринарха, затворника Ростовского

Акафист святому преподобному Иринарху, Ростовскому чудотворцу

Другие иконы:

Икона святой великомученицы Варвары

Икона святителю и чудотворцу Николаю, Мир Ликийских

Икона преподобного Антония Великого

Икона Преподобные схимонах Кирилл и схимонахиня Мария

Икона святым Киру и Иоанну

Икона Божьей Матери Козельщанская

Икона преподобному Агапиту Печерскому, врачу безмездному

Икона Божьей Матери “Неувядаемый Цвет”

Икона Божьей Матери “Живоносный Источник”

Икона Никите, епископу Новгородскому

Икона святому преподобному Мартиниану

Икона преподобному Никите Столпнику, Переславскому чудотворцу

Икона святой Людмиле

Икона преподобного Серафима Вырицкого (Муравьев)

Православные информеры для сайтов и блогов

Все иконы к Пресвятой Богородице и святым .

Православные акафисты

Избранный угодниче Христов и преславный чудотворче Иринарше, дивно на земли в чине ангельстем пожил еси и ныне, яко имеяй велие дерзновение ко Господу, буди теплый о нас пред Богом заступник, да с любовию зовем ти:

Радуйся, Иринарше преподобне, пустынножителей светлое украшение.

Ангел земный и человек небесный явился еси преподобне Иринарше: от юности бо твоея Господеви благоугождая, все житие твое в добровольном подвизе страдальчествования проводил еси и Рая присноблаженнаго достигл еси, идеже ныне ликуя, услыши и нас, на земли поющих ти таковая:

Радуйся, православныя церкве Христовы превеликое украшение.

Радуйся, отечествия твоего светильниче пресветлый.

Радуйся, любовию ко Господу сердце твое от юности уязвивый.

Радуйся, и сам от Него возлюблен бывый.

Радуйся, воине Христов добропобедный.

Радуйся, силою свыше облеченный.

Радуйся, Царствия Небеснаго наследниче.

Радуйся, о всех чтущих тя усердный молитвенниче.

Радуйся, Иринарше преподобне, пустынножителей светлое украшение.

Видевше рождшии тя и знаемии, яко Благодать Божия почи на тебе, блаженне, радостию Святою радовахуся, и Христа о сем славляху, поюще Ему: Аллилуиа.

Разума Божественна исполнився, познал еси, преподобне, яко благо есть мужу, иже возмет ярем Господень на ся от юности своея, и сего ради во след Христа со усердием потекл еси. Темже зовем ти:

Радуйся, иго Господне на себе вселюбезно приявый.

Радуйся, в терпении спасения души своея искавый.

Радуйся, во смирении твоем Сыну Божию, смирившемуся до рабия образа, подражавый.

Радуйся, Бога и ближняго твоего паче себе возлюбивый.

Радуйся, слезами на земли сеявый.

Радуйся, притекающих к заступлению твоему послушателю скорый.

Радуйся, Иринарше преподобне, пустынножителей светлое украшение.

Сила Вышняго от юности даровася ти, блаженне: далече бо сый, кончину отца твоего умныма очима узревый, и братиям своим по плоти о сем возвестивый, сим удивил еси тыя и научил еси звати Богу: Аллилуиа.

Имый всеусердное о спасении души твоея попечение, во обитель страстотерпцев Христовых Бориса и Глеба притекл еси, и тамо, пред игуменом пад, о вчинении себе в лик иноков всеусердно молил еси, еже и улучил еси приемый постриг главы твоея во отвержение мира и сует его. Мы же сия зряще, таковая поем ти:

Радуйся, мирская возненавидевый, да Христов раб будеши.

Радуйся, постниче терпеливейший, хлебом живота вечнаго душу твою питавый.

Радуйся, во плоти небесный жителю.

Радуйся, наставниче великий к путем спасения.

Радуйся, трудолюбием твоим во обители Борисоглебстей просиявый.

Радуйся, страстотерпче Христов долготерпеливе.

Радуйся, постников похвало и славо.

Радуйся, воздержания подвижников чистейшее зерцало.

Радуйся, Иринарше преподобне, пустынножителей светлое украшение.

Бурю велию напастей воздвиже на тя ненавидяй добра диавол, обаче не поколеба доблести души твоея, посреди пещи искушений немолчно Богови зовущаго: Аллилуиа.

Слышав Господа в Евангелии своем глаголюща, яко многими скорбьми подобает нам в Царствие Небесное внити, уготовал еси плещи твоя на раны и ланите на заушения, всякое озлобление ради Христа претерпети готовый. Мы же, сицевую высоту духовныя жизни твоея зряще, ублажаем тя похвалы таковыми:

Радуйся, всего себе в волю Господню предавый.

Радуйся, Христа Распятаго паче всего возлюбивый.

Радуйся, терпением злостраданий Иову себе уподобивый.

Радуйся, язвы Господа Иисуса на теле твоем носивый.

Радуйся, узы Христовы на ся возложивый.

Радуйся, ужема железныма коварства вряжия связавый.

Радуйся, величием подвигов своих ангелы возвеселивый.

Радуйся, жестоким твоим житием человеки удививый.

Радуйся, Иринарше преподобне, пустынножителей светлое украшение.

Боготечней звезде подобяся, протекл еси земное поприще твое, Иринарше, всемогущею Благодатию Божиею покрываем, и небесных видений сподобляем, в нощех и во днех поя Владыце: Аллилуиа.

Видевше тя иноцы обители, в ней же подвизался еси, земная презирающа, и в рубех и необувенныма ногама ходяща,вознегодоваша и двакраты из ограды своея извергоша. Ты же, незлобив сый, во град Ростов текл еси, о изгнавших тя молитвы возсылая. Сего ради приими от нас сицевая:

Радуйся, терпением скорбей всяческих просиявый.

Радуйся, вольною нищетою вечное богатство стяжавый.

Радуйся, всяцем образом Владыце всех угодивый.

Радуйся, равноангельное житие на земли поживый.

Радуйся, веры светлый светильниче.

Радуйся, ко грядущему граду верный наставниче.

Радуйся, вся земная во уметы вменивый.

Радуйся, незлобием твоим ризы души своея убеливый.

Радуйся, Иринарше преподобне, пустынножителей светлое украшение.

Проповедницы воли Божественныя о тебе явишася самобратия Святая Роман с Давидом, и в видении тебе представше, во обитель свою, из неяже изгнан был еси, паки тя глашаху. Ты же от видения воспрянув, и радости исполнься, Богови воззвал еси: Аллилуиа.

Возсиявша благодатна светильника, яви тя Господь, егда не ведомыми судьбами своими из ограды обители святых мучеников во град Ростов тя изведе, да и во обителех Авраамиевой и Лазаревой прославится о тебе имя Его. Мы же таковому о тебе Божию смотрению удивльшеся, глаголем ти таковая:

Радуйся, орудием воли Божия бывый.

Радуйся, во смиренномудрии поживый.

Радуйся, страсти в души твоей искоренивый.

Радуйся, явлением ти преподобнаго Авраамия почтенный.

Радуйся, союзом любве со блаженным Иоанном себе связавый.

Радуйся, прозорливым глаголом уст его внимавый.

Радуйся, стогны ростовския подвиги твоими освятивый.

Радуйся, о всех притекающих к тебе усердный молитвенниче.

Радуйся, Иринарше преподобне, пустынножителей светлое украшение.

Хотяй всем спастися Владыка Господь чудным гласом воспяти тя от намерения твоего оставити пределы ростовския и к северу уклонитися. Ты же, послушлив сый, всего себе воли Его предав, воззвал еси Ему: Аллилуиа.

Новый воистинну Даниил явился еси, преподобне, в дивнем видении твоем узревый грядущия судьбы Царства Российскаго, и повеление от Бога прием, потекл еси ко граду Москве, идеже царю Василию небоязненно рекл еси о всех, хотящих быти. Мы же, тайнозрению твоему дивящеся, сицевая тебе приносим:

Радуйся, провидче дивный, будущая яко настоящая, узревый.

Радуйся, духом твоим о сих вельми возскорбевый.

Радуйся, веления Божия послушниче усердный.

Радуйся, небоязненно повеленная ти цареви явивый.

Радуйся, словесы твоими сего укрепивый.

Радуйся, беззаконий сынов ея твердейший обличителю.

Радуйся, о спасении Царства Российскаго богоугодный молитвенниче.

Радуйся, о мире Державы Российския пред Господем предстателю.

Радуйся, Иринарше преподобне, пустынножителей светлое украшение.

Странен и дивен путь спасения протекл еси, блаженне, егда от иконы Распятия Христова повеление восприим, в затвор вшел еси, в нем же тело твое ужема железныма связав и множество железных крестов на ся возложив, во дни и нощи Владыце твоему звал еси: Аллилуиа.

Весь был еси умом и сердцем в горнем, аще и в хижине малей заключився, преподобне. Тем же и ныне водворяяся на небеси, заступаеши всех, верою и любовию вопиющих ти таковая:

Радуйся, в терпении и злострадании житие твое препроводивый.

Радуйся, волю свою заповедем Господним покоривый.

Радуйся, благодатию Духа Святаго осиянный.

Радуйся, источниче чудес богодарованный.

Радуйся, исцелений независтный подателю.

Радуйся, немудрых богомудрый наказателю.

Радуйся, правды Божия нелицеприемный возвестителю.

Радуйся, обидимых многомощный защитителю.

Радуйся, Иринарше преподобне, пустынножителей светлое украшение.

Во всяких напастех и скорбех всем был еси утешитель благодатный, тугу сердечную страждущих словесы и молитвами твоими прогоняя, и во уповании на помощь Вышняго тех укрепляя, и научая пети Ему: Аллилуиа.

Витии многословесныя по достоянию восхвалити не возмогут мужества души твоея, богомудре отче наш Иринарше: варваром бо на обитель твою находящим и иноком ю оставльшим, ты един пребыти зде не убоялся ecи, Богу себе вручая. Темже любовию восхваляем тя сице:

Радуйся, убивающих тело, души же убити не могущих, не устрашивыйся.

Радуйся, воине Христов непоколебимый.

Радуйся, жизнь будущаго века паче временнаго жития возлюбивый.

Радуйся, силою словес твоих, благодати исполненных, врагов обличивый.

Радуйся, теми ярость сих в кротость преложивый.

Радуйся, пред военачальники вражиими православна и верна быти Царю своему исповедавый.

Радуйся, хищений их небоязненный обличителю.

Радуйся, грядущаго на них гнева Божия верный возвестителю.

Радуйся, Иринарше преподобне, пустынножителей светлое украшение.

Спастися хотящим человеком, добр вождь явился еси, преподобне, от египта страстей в земли обетованней тех путеводствуя и ученьми своими наказуя, во еже пети Творцу всех: Аллилуиа.

Стену необоримую и ограждение нерушимое не точию обители твоей и стране ростовстей, но и всей Державе Российстей дарова тя Господь, всеблаженне, ибо благоприятными твоими молитвами оныя ограждаеши и от нахождения иноплеменных свобождаеши. За сия убо приими от нас похвалы сицевыя:

Радуйся, российстей земли Богом дарованный защитителю.

Радуйся, святыя обители твоея неусыпный хранителю.

Радуйся, любовь твою ко отечествию земному в житии своем явивый.

Радуйся, туюжде любовь к нему и по смерти сохранивый.

Радуйся, князя Димитрия Крестом Христовым благословивый.

Радуйся, небоязненно тещи на освобождение царствующаго града Москвы глаголы своими того утвердивый.

Радуйся, свобождению царскаго града предивный помощниче.

Радуйся, светом небесным, приходящия к тебе озаряяй.

Радуйся, Иринарше преподобне, пустынножителей светлое украшение.

Пение непрестанное во всем житии твоем Богови приносил, еси, преподобне отче наш Иринарше. Ныне же от нас воспеваемый и по достоянию ублажаемый на земли, тамо, на небеси, купно со ангелы прославльшему тя дивно Господеви зовеши: Аллилуиа.

Светозарна светильника яви тя, блаженне, Христос Бог, егоже сиянием людие просвещаются, и тебе, яко спасения их виновнику, приносят таковая:

Радуйся, доблий подвижниче, враги спасения победивый.

Радуйся, изгнания благодушно приявый.

Радуйся, изриновение из затвора твоего и биения злых человек претерпевый.

Радуйся, душу твою дарованьми небесными украсивый.

Радуйся, в воздаяние трудов твоих и болезней силу прозрения и чудодействия получивый.

Радуйся, мучительства злых бесов человеки свобождаяй.

Радуйся, даровании Божиих всем подателю.

Радуйся, ко грядущему Граду Небесному верный наставниче.

Радуйся, Иринарше преподобне, пустынножителей светлое украшение.

Благодатию, данною ти от Бога, отче, преведи ны безбедно по бурному морю житейскому, и в тихое пристанище Небеснаго Царствия сподоби достигнути, да тамо, вкупе с Тобою, в безконечныя веки Владыце нашему поем: Аллилуиа.

Поем дивное твое житие, блажим великия и преславныя твоя подвиги, почитаем честную и достохвальную кончину твою, величаем небесную славу твою и от избытка сердец наших похвальная зовем ти сице:

Радуйся, в чертозе небеснем лику святых сопричтенный.

Радуйся, христианом скорый помощниче.

Радуйся, нищету совершенную до конца сохранивый.

Радуйся, тягчайшия вериги твоя, яко утварь драгую, на плещех своих носивый.

Радуйся, врачеваний безмездных всемилостивый подателю.

Радуйся, ленивых к подвигом возбудителю.

Радуйся, исправления грешников поручителю.

Радуйся, обители твоея и страны ростовския славо.

Радуйся, Иринарше преподобне, пустынножителей светлое украшение.

О всехвальный угодниче Христов и чудотворче предивный, преподобне и преблаженне отче наш Иринарше, с верою и любовию вопием тебе всеусердно: приими ныне малое моление сие наше, и умоли Милостиваго Бога, да избавит нас от всяких бед и напастей, и будущия свободит муки, вопиющих Ему: Аллилуиа, Аллилуиа, Аллилуиа.

Сей Кондак читается трижды, затем Икос 1 и Кондак 1.

Молитва первая преподобному Иринарху Ростовскому

О великий угодниче Христов, добропроизвольный страдальче, новопросиявый чудесы, отче наш Иринарше. Российстей земли удобрение, граду Ростову похвало, обители сей велие украшение и утверждение! Кто не удивится твоему самопроизвольному и долголетнему страдальческому терпению: Тридесять бо лет в тесней и хладней хижине себе заключил еси, хлад, алчбу и изнурение плоти Царствия ради Небеснаго понесл еси, к сему же и изгнание из обители, по наваждению вражию, безропотно претерпел еси. Вемы же, яко посреди умолен быв от братии, яко незлобивый агнец, паки в обитель твою возвратился еси и в туюжде хижину вселился еси, яко адамант твердый, на невидимая бесовская полчища и видимыя враги твоя терпением себе вооружив. Егда же попущением Божиим наидоша на обитель сию польстии ратницы, сих не убоялся еси смертнаго прещения, но уцеломудрився словом, во своя си возвратитися сотворил еси. Сего ради Всеблагий Бог, видя твою веру и страдальческое долготерпение, дар прозорливства и исцеления тебе дарова: бесным бо исцеление, хромым доброхождение, слепым прозрение подавал еси, и иная многая с верою к тебе приходящим во благо даже доднесь чудодействуеши. Мы же недостойнии, таковая чудеса видяще и радости исполняющеся, взываем к тебе сице: Радуйся, доблественный страдальче и бесов победителю, Радуйся скорый наш помощниче и теплый к Богу молитвенниче. Услыши убо и нас грешных, молящихся тебе и прибегающих под кров твой: яви милостивное предстательство твое о нас ко Всевышнему и исходатайствуй твоими богоприятными молитвами вся полезная ко спасению душ и телес наших, сохрани святую обитель сию, всякий град и весь и всякую страну христианскую от всех наветов вражиих, в скорбех же и болезнех наших подавай нам руку помощи, да твоим ходатайством и заступлением, благодатию же и милосердием Христа Бога нашего, избавимся и мы недостойнии, по отшествии от жития сего, шуияго стояния, и да сподобимся деснаго со всеми святыми во веки веков. Аминь.

Молитва вторая преподобному Иринарху Ростовскому

О преподобне отче Иринарше! Се мы молим тя усердно: буди ходатай наш присный, испроси нам, рабам Божиим (имена), от Христа Бога мир, тишину, благоденствие, здравие и спасение, и от всех врагов видимых и невидимых ограждение, покрый же нас ходатайством твоим от нахождения всяких бед и скорбей, паче же от искушений врага темнаго, да вси мы с тобою прославляем всесвятое имя Отца и Сына и Святаго Духа, ныне и присно и во веки веков. Аминь.

Молитва третья преподобному Иринарху Ростовскому

О предивный и преславный чудотворче, преподобне и достоблаженне отче Иринарше! Величающе труды твоя и болезни и прославляюще великое твое дерзновение ко Господу, тебе, яко отца чадолюбива, молим: ходатайствы твоими испроси нам у Господа, яже на пользу душам и телесем нашим: веру праву, надежду несомненну, любовь нелицемерну, во искушеиих мужество, в злостраданиих терпение, в благочестии преспеяния, и благословение свыше на вся благая дела и начинания наша. Испроси угодниче Христов у Всемогущаго Бога: страждущую страну Российскую от лютых безбожник и власти их да свободит, и да воставит престол православных царей: верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. Не забуди, чудотворче святый, милостивно присещати обитель твою, вся грады и веси страны нашея, сохраняя и соблюдая молитвами твоими от всякаго зла. Помяни всех, веру к тебе имущих и имя твое на помощь призывающих, и вся во благих прошения их милостивно исполни. Ей, святче Божий, не лиши и нас грешных твоего заступления, сподобляя нас кончину жития благую улучити и Царствия Небеснаго наследники быти, да воспоем и прославим дивнаго во святых своих Бога, Отца, и Сына и Святаго Духа, в безконечеыя веки веков. Аминь.

Тропарь преподобному Иринарху Ростовскому, глас 4

Яко мученика добропроизвольна и преподобных удобрение, звезду Ростовскую, в затворе, узах и веригах Господеви благоугодившаго и чудес благодать от Него приемшаго, Иринарха предивнаго песньми хвалебными почтим и, к нему припадающе, умильно глаголем: отче преподобне, моли Христа Бога спастися душам нашим.

Читать другие акафисты раздела "Православные акафисты"

Читайте также:

© Миссионерско-апологетический проект "К Истине", 2004 – 2016

При использовании наших оригинальных материалов просим указывать ссылку: